Hljómar - Hljómar
Á rjúkandi rústum seinni heimsstyrjaldarinnar reis hinn nýi heimur. Úti á tímans vegi urðu tónarnir harðari og takturinn hraðari. Hjá Elvis í Ameríku og Bítlunum á Bretlandi blöktu gunnfánar rokksins við hún. Á landinu kalda voru margir kallaðir til, en það voru Hljómar frá Keflavík sem voru hinir útvöldu. "Some guys got it, others don´t" svo einfalt er það. Hljómarnir höfðu það svo sannarlega.
Þeir voru frumherjar, það fór ekki á milli mála. Ekki aðeins fyrsta bandið sem náði almennilega tökum á erlenda rokkinu sem tröllreið öllu, heldur voru þeir fyrstir til að koma eigin efni á hljómplötur. Frægð þeirra barst með leifturhraða um landið allt. Engin sveit á sjöunda áratugnum náði viðlíka hæðum.
Hljómplötur þeirra seldust í bílförmum, sjónvarpið tók þá upp á arma sína og gerði með þeim fjölda þátta. Kvikmynd Reynis Oddsonar um Hljóma "Umbarumbamba" var sýnd í bíóhúsum um allt land og "Saga Hljóma", skrifuð af Ómari Valdimarssyni, var gefin út á vordögum 1969. Semsagt allur pakkinn, plötur, sjónvarp, kvikmynd og bók. Og hvað svo búið spil? Nei aldeilis ekki!
Stórtíðindin eru þessi; fjörutíu árum eftir fæðingu sveitarinnar, frægð og frama félaganna á öðrum vígstöðvum, koma Hljómar saman aftur og gera öllum á óvart nýja plötu.og án efa þá bestu. Tólf sterk lög, sem bjóða upp á allt það besta úr smiðju Hljóma, þar sem fara saman fegurstu ballöður, frábærara raddsetningar og feitt rokk.