Guitar Islancio- Hljóðmyndir í 120 ár
Fjöldi tónlistarmanna, gagnrýnenda og fræðimanna hefur lýst þeirri skoðun að Dylan hafi ásamt Bítlunum sett tónlisarheiminum ný viðmið um hvaða hæðum, breiddum og dýptum hægt er að ná innan tónanna tólf og textanna sem þeim fylgja. Bruce Sprinsteen sagði eitt sinn að rétt eins og Elvis hafi frelsað líkamann hafi Dylan frelsað hugann.
Bob Dylan situr venjulega við háborðið þegar listar eru settir saman um mikilvægasta fólkið í sögu tónlistarinnar og reyndar einnig í almennri umfjöllun um öldina sem leið. Til dæmis valdi Time Magazine hann einn af hundrað mikilvægustu manneskjum 20. aldarinnar.
Tölfræðin segir sína sögu um áhrif Bob Dylan á tónlistarsöguna: Stór hópur tónlistarfólks og gagnrýnenda var kallaður saman árið 2003 af tímaritinu Rolling Stones til að velja 500 bestu plötur allra tíma og var Bob Dylan þar með 10 stykki. Í svipaðri samantekt yfir 500 bestu lög allra tíma, frá árinu 2004, var lagið Like a Rolling Stone valið besta lag allra tíma en á þeim lista var Dylan með alls 13 lög eða 2,6% af þessu úrvali þess besta. Það verður spennandi að sjá hvernig okkar fremsta tónlistarfólk mun fara með sínar uppáhaldsperlur úr þessum óviðjafnanlega fjársjóði.